Free Calendar by Brolmo.com   tuis - jongste nuus

Buitemuurs K2 2018  |  Klasposisies K1, 2018 

   
     
 
Geplaas op 21 Mei 2018, 16:58  
 

Nuus: Nuweland-uitstappie, Sport, Jason en AMESA

Terwyl die eksamen vinnig nader kom, is dit darem nog nie hééltemal sulke tyd nie en is daar 'n paar berigte vir vandag. Ons lig u ook in in verband met die nuwe week se bedrywigheide.

 
Tydens die naweek van 12 Mei is 'n groep graad 6 en 7 seuns deur mnr Davids en Crafford asook hul gades na die Stormers se wedstryd teen die Chiefs op Nuweland vergesel. Alhoewel die wedstryd nie in ons guns was nie, was die uitstappie self 'n groot opgewondenheid van begin tot einde. Die groep het selfs 'n draai by die Grand West casino gemaak waar hulle met skaatse op ys gedobbel het. Die onvergeetlike ervaring is moontlik gemaak deur verál mnr Davids en Crafford. Baie dankie vir jul inisiatief wat verseker 'n paar drome bewaarheid het!
 

Verlede week se Sport

Die rugby liga-wedstryde van verlede week het teen Zoar EK Primêr plaasgevind. Die O-9 span was nie op hul beste nie en kon, te wyte aan vele basiese foute, slegs met 5 - 5 gelykop speel. Die O-11's het egter beter vertoon en was met 25 - 5 baas. Die O-12's se eindtelling was 20 - 15. Ons wens julle geluk en dankie vir die getroue bewoning van oefeninge! Voorts het mnr Willemse die Kannaland-span na Albertinia vergesel waar hul ongelukkig met 7 - 24 verloor het.

Wat die netbal betref, het wedstryde plaaslik teen Towerkop plaasgevind terwyl die O-17's en O-19's teen Langenhoven in Riversdal gaan speel het. Die O-15's het daarin geslaag om met 6 - 5 te seëvier, die O-13's met 16 - 10 terwyl die O-14's met 12 - 16 vasgeval het. Die senior meisies het sterk kompetisie teen Langenhoven verwag, maar die kwaliteit van spelers waarteen hulle te staan gekom het, was steeds 'n verrassing. Ten spyte daarvan is die meisies baie dankbaar vir die geleentheid wat hul gegun is en het die O-19's goed gevaar deur 7 doele teen 14 aan te teken. Baie dankie aan juffrou de Villiers wat die wedstryde gereël en die bussie bestuur het.

 
Vandeesweek speel ons teen RP Botha. Die wedstryde sal op Zoar se veld gespeel word - baie dankie weereens hiervoor! Die Kannaland-span speel komende Donderdag teen Gerrit du Plessis - dit is 'n wegwedstryd. Sterkte aan almal met jul voorbereidings! Ons deel u mee dat die wedstryde teen Gamka-Oos wat môre sou plaasvind, gekanselleer is.
 

Jongste nuus oor Jason Roodman

Soos vroeër berig, het Jason onlangs 'n dubbele longoorplanting ondergaan. Nadat daar aanvanklik komplikasies na afloop van die operasie was, het Jason intussen gestabiliseer en gaan dit tans baie beter! Alle eer aan ons Hemelse Vader asook die span dokters en verpleegsters wat hom versorg. Mag jy gou weer op die been wees!

 
 

AMESA-uitslae

'n Groot groep leerders (kliek hier vir die oorspronklike berig) het onlangs aan die AMESA asook Natuurwetenskappe olimpiades deelgeneem. Ons het die uitslae vir AMESA ontvang en die volgende leerders dring deur na die tweede rondte: Lisa Steyn, Adriaan Diemer, Xaya Rose en Riefqa Mentoor.

Wat 'n pragtige prestasie! Baie geluk, leerders! Aan die wat nie verder vorder nie: dankie dat jul deelgeneem het. Volgende jaar, wie weet...

 
     
 
    skoolleuse    
    Ons leuse is Excelsior, 'n Latynse woord. Dit beteken om altyd hoër te streef en jouself voortdurend te verbeter. Die leuse is soortgelyk aan die Latynse woorde semper altior - altyd hoër.  
     
    nss-toppresteerders, 2017  
   

Die volgende leerders het uitstekend tydens die afgelope Nasionale Senior-Sertifikaat eksamen presteer. Ons is waarlik trots op hulle!

Jodene Willemse - Eerste Posisie

 
   

Jodene slaag die eksamen met 'n gemiddeld van 73.57%. Sy behaal onderskeidings in Afrikaans (81%) en Toerisme (83%).

Sy beoog om óf vanjaar Bemarking by CPUT te studeer of om in 2019 by NWU aan te sluit.

Baie geluk en alle voorspoed vir die toekoms!

 
  Anrico Adams - Tweede Posisie  
   

Anrico slaag die eksamen met 'n gemiddeld van 73.14%. Hy behaal 'n onderskeiding in Engels (80%) asook vier kode 6's.

Anrico se groot droom is om 'n prokureur te word en sy aansoek by UWK was suksesvol.

Baie geluk en alle voorspoed vir die toekoms!

 
     
    verfraaiingsprojek - foto's
 

Bootstrap Slider
 
   
    argief  
 

 

K1, 2017 - K2, 2017 - K3, 2017 - K4, 2017 - nss_2016, K1, 2018

 
 
    top 5 - balkies
  'n Inisiatief van mnr Andrew Davids. Die top 5-leerders vir elke graad geniet kwartaalliks erkenning en die balkies is nóg 'n manier om hul vir hul harde werk te beloon. Die top-leerder in elke graad dra 'n goue balkie en die ander blou balkies. Die balkies word aan die begin van elke kwartaal uitgedeel en weer aan die einde ingehandig.  
   
  Vir die beste leerder in elke graad Vir die 2de tot 5de posisie  
 
    verjaarsdae: personeel en gades  
 

15 Januarie
28 Januarie
14 Februarie
23 Februarie
24 Februarie
1 Maart
20 Maart
2 April
5 April
6 April
26 April
31 Mei
3 Junie
21 Junie
1 Augustus
3 Augustus
5 Augustus
25 Augustus
8 September
25 September
26 September
1 Oktober
3 Oktober
21 Oktober
28 Oktober
30 Oktober
5 November
9 November
17 November
4 Desember
19 Desember

Mnr Jean Dekker
Juffrou Anthea Jacobs
Mnr SA Elie
Mnr Stefaan de Wit
Juffrou Lize-Marie Swart
Mnr JD Willemse
Mnr Juandré September
Juffrou Ina de Wit
Juffrou Linda Radyn
Juffrou Annalize Nel
Mev Adéle Dekker
Juffrou Leoni Fourie
Mnr Snyman van Tonder
Mnr Fanie Fourie
Mev Gail Davids
Juffrou Chantel Oosthuizen
Juffrou Karien van Tonder
Mnr Jacques le Roux
Mev Annemarie Rall
Mev Rachel Elie / Juffrou Andrea Job
Mev Carinne Crafford
Mnr Hendré Radyn
Mnr Hoffie Nel
Juffrou Roné de Villiers
Mnr Andrew Davids
Mnr Jannie Rall
Mev A Willemse
Juffrou Belona Peceur
Mnr Dawid Crafford / Mnr Colin Peceur
Mnr Charl Jacobs
Juffrou Roxanne Griebelaar

 
 
Geplaas op 11 Mei 2018, 14:54  
 

Jongste gebeure: 'n braai, 'n vaart, 'n Jason en Hanneli, 'n toffel, olimpiades ens. ...

Op Vrydag, 4 Mei, is die hoenderbraai met groot sukses aangebied! Teen ongeveer 3pm was die meeste braaiwerk reeds afgehandel, grootliks as gevolg van Sipho en Karel wat drie addisionele groot roosters gesweis het. Agter die skerms het elkeen 'n bydrae gelewer: van organisering tot braai en opskep. Ouers, baie dankie ook aan elke donasie en skenking - dit het sommer baie gehelp! Aan die koshuis wat die slaaie help voorberei het - groot waardering! Volgende jaar maak ons natuurlik weer so!

 
 

Jason Roodman - 'n Man soos min

Ons het vanoggend ongelooflike goeie nuus gekry! 'n Oud-leerder, Jason Roodman, het twee longe wat met sy bloedgroep compatible is, van 'n orgaanskenker ontvang. Hy word vandag geopereer. Jason is in matriek met die gesogte trofee vir die hardwerkendste leerder beloon. Sy siekte, sistiese fibrose, was nooit 'n verskoning om nie sy bes te lewer nie en hy is 'n voorbeeld van ongelooflike deursettingsvermoë en durf. Jason, mag die operasie 'n rasende sukses wees! As daar een persoon is wat 'n tweede kans deur en deur vedien, is dit jy.

 
 

Dr Hanneli van der Merwe - Bark(ing) mad

Nee, dr van der Merwe is nie regtig van lotjie getik nie. Hanneli, nog 'n oud-leerder van HSL, was verlede Sondagaand, 6 Mei, op die KykNet program Kwêla. Sy het 'n splinternuwe reeks tonikum-water ("tonic water"), naamlik Barker and Quin, ontwikkel en is tans besig om dit saam met haar vennoot, Chris Wium, te bemark. Terloops, sy is die eerste vrou wat 'n doktorsgraad in wynkunde aan die Universiteit van Stellenbosch behaal. Soos haar man, die snydokter Renier van der Merwe, ook 'n HSL oud-leerling, tereg opmerk, is Hanneli iemand wat, wanneer sy haar tot 'n taak toewy, dit voluit doen. Sy is 'n uitstekende voorbeeld van een van HSL se waardes, nl. volharding. Baie geluk met alles wat jy in die afgelope paar jaar vermag het! Klik op die skermskoot hieronder om die Kwêla-onderhoud af te laai en/of te stream. (Formaat = mp4; Grootte = 10.4MB)

 
 

Hemelvaartdag

Christene het Jesus se hemelvaart gister herdenk. Alhoewel HSL nie die skool vir die dag gesluit het nie, het ons wél reëlings getref vir 'n persoon om met die leerders te kom praat. En wie anders as een van die dorp se ysters? Aldricht Makriga, ons 2017 VRL-Voorsitter, en tans besig met studies in Elektriese Ingenieurswese, het reeds terwyl hy nog op die skoolbanke was, 'n natuurlike talent as christelike spreker getoon. Sy woorde was besonders, in die sin dat ons werklik die Heilige Gees se teenwoordigheid kon voel. As skool bedank ons jou graag vir jou oneindige bereidwilligheid om die leerders se geestelike lewens te help bou. Jou hemp was ook mooi.

 
 

Natuurwetenskappe en AMESA olimpiades

Op 10 en 11 Mei het ons goeie deelname aan die eerste rondte van genoemde twee olimpiades gehad. Die NW-olimpiade fokus grootliks op biologiese konsepte terwyl AMESA uitsluitlik op Wiskunde fokus. Die volgende leerders het deelgeneem:

NW-Olimpiade

In volgorde op foto: Madeleine Diemer, Lilly-Ann de Wet, Mikyla Berry en Eduané Ntsulungu. Voor sit Franco Jacobs en Ronwin Persence. Anushka Grundling en Chanté Jafta was afwesig.

 

AMESA-Olimpiade

  • Graad 4: Casidy Festus, Renacia Timmie, Jani van Tonder, Rowin Timmie, Ceonté van Rooi en Mateo Swart
  • Graad 5: Vernolene Abdol, Caillen Januarie, Ethan Kiewiet, Dani Lee Williams en Piper Voster
  • Graad 6: Lisa Steyn, Xaya Rose, Adrian Diemer, Linda Swart, Stefan van Tonder, Anel van Tonder, Zenan Killian, Zeete Meyer, Louis van Wyk, Enrico Linnerts en Juané Slump
  • Graad 7: Franco Jacobs, Tyrique Bell, Riefqa Mentoor, Chanté van Rooi, Lilly-Ann de Wet, Heinrigd Sny en Mikyla Berry
Rondte twee van die AMESA-olimpiade vind in Augustus plaas. Baie dankie aan elke leerder wat deelgeneem het. Ons hou duimvas!
 

Skaakproewe

Drie leerders, Sarie Roodtman, Conray Arnolds en Zeenan Moli, neem hierdie naweek aan skaakproewe in George deel. Alle sterkte! Mario Huisamen kan weens persoonlike omstandighede nie deelneem nie. Ons bedank graag juffrou Ina en haar man, oom Stefaans, wat die leerders vervoer.

 
 

Pantoffeld(r)ag

Op 11 Mei kon die leerders pantoffels skool toe aantrek. Hulle moes R2.00 vir hierdie voorreg betaal. Hulle kon egter ook 'n donasie van hul keuse maak. Die geld gaan aan 'n behoeftige persoon binne die gemeenskap geskenk word. Ons kan regtig nie elke voet en toffel publiseer nie, maar u behoort die idee te kry!

 
   
   
 

Sport: Heidelberg Sportdag

Wat die sport betref, het ons spanne die afgelope twee weke heelwat wedstryde gespeel. Op 5 Mei het ons aan Heidelberg se sportdag gaan deelneem. Dit was oudergewoonte uitstekend georganiseer en ons sien reeds uit na 2019. Sover dit die uitslae aangaan, is gemengde welslae behaal. Die O-9 rugbymanne het een wedstryd gewen, die tweede verloor en 'n gelykop uitslag in die derde afgedwing. Hierdie kêrels is besig om in 'n oulike span te ontwikkel. Hulle moet net nie so baie stry nie en mekaar verkieslik NA DIE WEDSTRYD VERBY IS afstof...

 
   
Die O-9 ysters in aksie teen De Waalville. Hier kry Frans Uithaler die bal in die hande.
Juffrou Ina se O-9's het moedig probeer, maar die bal het hom simpel gehou en net af en toe deur die ring geval. Die kinders self het regtig oulik gespeel, gegewe dat Netbal so 'n vinnige spel is. Volgende keer gaan dit sommer stukke beter! Hier is 'n foto waar die bal sy samewerking gegee het (juffrou Ina het hard met die bal geraas...) Doel: Ladismith.
Juffrou Linda se O-12's het 'n besonderse goeie dag beleef deur vier van hul vyf wedstryde te wen. Voorwaar 'n droomspan! Hier poseer die trotste span:

Die O-15 spelers van juffrou Job het teen gedugte kompetisie, veral in die vorm van Hoërskool Langenhoven, te staan gekom. Hulle moes boonop voor die wedstryde hoor dat een van hul spelers nie beskikbaar was nie. Boonop het een met 'n maagaandoening gesit, NIE 'n goeie toestand om in sport te doen NIE. Gelukkig kon 'n oud-leerder, mnr Davids se jongste spruit, Zoë, die span uithelp deur op senter diens te doen. Die span het werklik goeie netbal gespeel, maar die kompetisie was eenvoudig te sterk. Ons bewonder egter jul veggees!

Ons bedank elke afrigter, ouer en speler wat die dag meegemaak het. Hoe meer ons ons kinders blootstel, hoe beter sal hulle speel. Dankie ook aan mnr Dekker wat die skool se bussie bestuur het.

 

Sport: Liga-wedstryde teen Amalienstein

Vandeesweek het ons ons liga-verpligtinge nagekom deur teen Amalienstein te speel. Dit was eintlik 'n tuiswedstryd, maar aangesien geen veld behalwe die landbougenootskap se veld tans vir wedstryde aangewend kan word nie, moes ons in Zoar gaan speel.

Die O-9 rugbyspan het Amalienstein met 60-10 oorrompel. Goeie samespel maar ook vele oomblikke van individuele briljantheid het tot die oorwinning bygedra. Die O-11's het met 10 elk gelykop gespeel en véél beter as in hul vorige wedstryd teen Shalom vertoon. Die O-13's moes op die ou end 'n sewes-wedstryd speel. Hulle het met 15 - 20 verloor. Dankie aan mnre Dekker en Crafford wat skeidsregters was en die bussie heen en weer bestuur het. Dankie ook aan mnr Willemse wat die O-13 wedstryd hanteer het.

Gevolglik die netbal-uitslae. Juffrou Ina se O-9's het met 2 - 0 geseevier. Ons sê mos dit help wanneer daar met die bal geraas word. Die O-10's wen met 11 - 1, die O-11's met 9 - 1 en die O'12's met 3 - 1. Uitstekend, meisies!! Die O-15's en O-18s het egter die spit met onderskeidelik 6 - 10 en 5 - 18 afgebyt. Juffrou Roné het egter spesifiek van Jesmine Selungu melding gemaak - sy het haar hart HARD uitgespeel. Hou so aan, dogters. 'n Wen is net 'n kwessie van tyd.

 
 

Entrepeneursdag Wenners

Die wenners van die Laerskool-entrepeneursdag, was Lisa Steyn en Linda Swart. Baie, geluk! Dankie ook aan die beoordeelaars, juffrou Faren, Annemarie en mnr September!

 
 
   
    video's en media  
  Videomateriaal van aktiwiteite verskyn hier. Kliek op die foto's om die grepe af te laai. Grootte en tipe word voorsien.  
   
  Elcardo Rothman se item wat hy tydens die matrieks se laaste skooldag gelewer het.

Grootte: 13.7MB; Tipe: mp4
 
  Hildred Swart se saxofoonsolo tydens 'n onlangse konsert van die Musiekhuis. Eerste optrede!

Grootte: 8.34MB; Tipe: mp4
 
   
       
   
Geplaas op 28 April 2018, 12:39  
 

Rugby en Nebal teen Shalom

Op Woensdag, 25 April, het ons laerskool rugby- en netbalspanne teen Shalom gespeel. Die rugby is op Shalom se veld gespeel en die netbal op ons bane. Die netbalspanne het hul wedstryde gemaklik gewen terwyl die O-9 rugbymanne met 70 - 5 baas was. Ons hou die huidige groep met groot belangstelling dop - daar is baie talent en die spelers is hoogs toegewyd! Die O-11's en O-13's het egter met tellings van onderskeidelik 20 - 10 en 30 - 5 vasgeval. Hard oefen, manne!

 
Die O-9 ysters saam met hul afrigter, mnr Dekker.
 

Modeparade en mnr en mej HSL

Die modeparade waar mnr en mej HSL aangekondig word, is die afgelope paar jaar reeds deel van die VRL se formele funksies. Vanjaar se funksie het op Woensdagaand, 25 April, plaasgevind. Daar was drie kategorieë: gewone en somerdrag, cowboy/country en aanddrag. Tussenin was daar optredes deur Sarie Roodtman (sangitem: One and Only deur Adéle), Renatha Agus (sangitem: Because you loved me deur Celine Dion) en die Black Muffins (sangitem: rap). Sarie en Renatha was werklik uitsonderlik - met die regte opleiding en ondersteuning kan hulle dit ver bring. Die seremoniemeesters was Leonardo Stefaans en Genevieve Makriga - hulle het hul taak met groot gemak verrig. Die aand was 'n baie groot sukses, te danke aan al die werk wat voor maar ook agter die skerms verrig is. Ons wens graag 2018 se mnr en mej HSL geluk: Mario Huisamen (gr12) en Renecia Timmie (gr10). Vervolgens 'n paar foto's:

 
   
 
 
   
Simmri Moses Sarie Roodtman Rozé Julies
 

Entrepeneursdag: graad 4 - 6

Jaarliks kry die verskillende fases die geleentheid om hul verkoopvernuf tydens entrepeneursdae ten toon te stel. Vandeesweek was dit die Intermediêre Fase se beurt. Van toffie-appels, fudge en kolwyntjies tot hotdogs, plaatkoekies, druiwe en speletjies - die tafel(s) was gedek vir oormatige blootstelling aan soet en sout. Alle stalletjies is beoordeel en die wenner word volgende Woensdag aangekondig. 'n Paar kiekies:

 
   
  Ons bedank graag al die Intermediêre Fase opvoeders wat by die organisering betrokke was. Ook dankie aan die ouers wat altyd 'n handjie bysit en toesien dat boetie nie die saal afbrand nie!  
             
 
   
Geplaas op 20 April 2018, 17:04  
 

Geagte ouers, leerders en vriende van HSL

'n Baie besige week vol vergaderings, werkswinkels, modereringsessies en natuurlik die byhou van die KABV, kom ten einde. Ons begin vandeesweek se opdatering op 'n hartseer noot.

Een van ons graad 7-leerders, Anuschka Grundling, het haar moeder, mev Anica Grundling, aan die dood afgestaan. Ons innige medelye aan die gesin en familie wat 'n ontsaglike groot verlies moet probeer verwerk. Mag ons hemelse vader u pad in hierdie donker tyd met Sy liefde en genade verlig.

Juffrou Roxanne Griebelaar het haar tannie verloor, iemand met sy 'n hegte verhouding gehad het. Ons dra u op in ons gebede en bid vir heling uit die Vaderhand.

 
 

Noodhulpkursus

Ongeveer 60 leerders asook 'n paar opvoeders het tussen Maandag en Woensdag vlak 1 en 2 noodhulpopleiding deur middel van die Emergency First Aid Responder (EFAR) program ontvang. Die sessies is só ingedeel dat daar op elke dag 'n ander groep leerders en opvoeders betrokke was.

Die sessies in deur Me Janine Ruiters in oorleg met mev Schultz, van Tonder en mnr Willemse gereël. Heelwat klem is op die praktiese sy van noodhulp geplaas terwyl die teorie ook behandel is. Alle deelnemers moes ná afloop van die kursus eksamen skryf. Ons deel die uitslae met u sodra ons in besit daarvan is. Baie dankie aan al die leerders wat hul middae vir hierdie ongelooflike geleentheid opgeoffer het. 'n Groot blyk van waardering vir almal wat by die reëlings betrokke was.

 
Zay-Dee Mentoor luister aandagtig na die lesing oor geweldadige beserings.
 

Loopbaanuitstalling

Vandag het verteenwoordigers van CTU Training Solutions in Stellenbosch die matrieks besoek. Die tipe kursusse wat deur die instansie aangebied word, is met die leerders bespreek wat deur 'n vraag-en-antwoord sessie gevolg is. Ons moedig ons leerders aan om soveel moontlik navorsing met betrekking tot die verskillende tersiêre instellings asook beurse te doen - daar bestaan ongelooflike geleenthede asook 'n wye verskeidenheid beroepsvelde. Ons bedank graag mnr September, die graad 12 LO-opvoeder, wat die reëlings getref het.

 
   
Anastacia Willemse en Qurin Grispe
 

Modeparade - komende week

Die Hoërskool VRL is hard aan die werk om die beplande modeparade asook die aanwys van meneer en mejuffrou Hoërskool Ladismith op Woensdagaand te laat realiseer. Die leerders moet 'n toegangsfooi van R5 by die deur betaal. Die aand beloof om, soos in die verlede, 'n groot sukses te wees. Moedig gerus u kind aan om die VRL te kom ondersteun!

 
 

Dogters-rugby

Verteenwoordigers van SA- en SWD-rugby het die skool op Woensdag besoek om dogters-rugby aan te moedig. HSL het in die verlede hieraan deelgeneem, met verál die Let's Play! inisiatief wat goed ondersteun is. Een van ons leerders, Daar is fondse vir vervoer beskikbaar en die dogters neem reeds op 1 Mei aan 'n toernooi in George deel. Ons sal die HSL-spelers binnekort aan u bekend stel.

 
 

Matrieks: Identiteitsdokumente

Elke graad 12-leerder móét 'n ID-dokument of -kaart besit voor hulle die NSS-eksamen aandurf. Die skool se bussie ry komende Donderdag Oudtshoorn toe uitsluitlik vir hierdie doel. Ons vertrek reeds TWEEDE POUSE. 'n Nuusbrief rakende die geleentheid is reeds in wording.

 
 
   
Geplaas op 11 April 2018, 18:11  
 

Netbalproewe

Vyf leerders neem vandag en môre aan die Oudtshoorn-netbalproewe deel. Hulle is Patricia Farao (O-15), Gabbi Pheiffer (O-16), Jayllah Arendse en Tacara April (beide O-17) en Kimberley Blignaut (O-19). Baie sterkte, dogters! Dankie ook aan juffrou de Villiers wat vir die reëlings verantwoordelik is.

 
V.l.n.r.: Jayllay Arendse, Patricia Farao, Gabbi Pheiffer, Tacara April en Kimberley Blignaut
     
 
   
Geplaas op 10 April 2018, 05:20  
 

Welkom by die tweede kwartaal!

Aan alle ouers, leerders, opvoeders en vriende van HSL: hartlik welkom by die tweede kwartaal. Ons vertrou u het 'n aangename tyd saam met u kind beleef en dat u saam met hulle slaggereed vir die nuwe uitdagings is. Onthou asseblief dat die skool vanaf môre, 11 April, om 07:30 open en om 14:00 verdaag. Ons gaan hierdie bladsy teen die einde van die week argiveer en, soos gewoonlik, gereeld terugvoering oor die skool se bedrywighede lewer. Graag maak ons melding van drie gebeurtenisse van verlede kwartaal.

Op Donderdag, 15 Maart, is die nuwe SBL verkies. Oorgenoeg ouers het die verkiesing bygewoon - ons was dus 'n kworum. Baie geluk aan die nuwe lede en sterkte met die groot taak wat op u skouers rus!

Op Saterdag, 10 Maart, is vier leerders, Mario Huisamen, Conray Arnolds, Sarie Roodtman en Zeenan Moli, deur mnr le Roux en juffrou Griebelaar na die Eden Skaakproewe te Calitzdorp vergesel. Hulle is almal in die span opgeneem en neem komende Saterdag, 14 April, aan verdere proewe in Mosselbaai deel. Veels geluk, leerders!

Dan het Mario die eerste plek tydens die rekenaarolimpiade van 7 April behaal. Die tweede plek word deur Jadon Hartman beklee. Beide is tans in Graad 12 en is uiters vaardig met rekenaars asook die vak RTT. Baie geluk, manne!

 
   
V.l.n.r.: Mario Huisamen, Sarie Roodtman, Conray Arnolds en Zeenan Moli
  Dan ook baie geluk aan juffrou Ina, juffrou Annalize en juffrou Linda wat gedurende die vakansie verjaar het. Mag die nuwe lewensjaar propvol vreugde wees!  
 
       
       
  ontwerp / ontwikkelling / instandhouding:  d EX   |  kopiereg © hoërskool ladismith 2017 - 2018  |  hosting deur webafrica     
hsladismith@gmail.com geskiedenis van die skool drhannelivdm_kwela_onderhoud